Бир томондан қараганда, уйдан ташқарига чиқмасдан ишлаш – жуда яхши вариант. Мабодо кечикиб қолсангиз ҳар хил баҳоналар ўйлаб топиш, шахсий ишларингизни бажариш учун жавоб олиш ва тушлик қилиш учун соат бир ёки икки бўлишини кутишнинг кераги бўлмайди. «Бугун нима кийсам экан» муаммоси ҳам бўлмайди ва сиз бемалол фақат ўзингизга ёққан ва қулай бўлган кийимингизни кийишингиз мумкин.
Бундай иш нафақат туғуруқ таътилида ўтирган ва уйдан ташқарига чиқишнинг зарурати бўлмаган ёш оналарга, балки ҳамма аёлларга ҳам жуда мос келса керак.
Шунга қарамасдан, бунинг ҳам салбий томонлари бор. Офисдаги ишга қараганда уйда қилинадиган иш раҳбарият томонидан камроқ назорат қилинади. Шунинг учун ишнинг бундай тури ўзини интизомга бўйсундириш ва ўзини ишга жалб қилишни талаб қилади.
Агар сиз ўз вақтингизни тўғри режалаштиришни, кунлик ва ҳафталик тузилган иш режасига риоя қилишни билмасангиз бу иш сиз учун жуда оғирлик қилади.
Иш – бу ҳар доим жавобгарлик, шунинг учун агар сиз уйда ишлашни танлаган бўлсангиз, унга ҳар қандай офис ишлари каби жиддий муносабатда бўлинг.
Агар ёш болангиз бўлса, уйда ўзингизга берилган иш билан хотиржам шуғуллана оламан деб ўйламанг. Одатда болалар ҳаддан ташқари диққатингизни чалғитади ва сиз ишни ҳам қилолмайсиз, болага ҳам яхши қарай олмайсиз. Агар сиз уйда ишлашни хоҳласангиз – бунинг учун озроқ бўлса ҳам шароит яратишингиз керак бўлади.
Масалан, болани ярим кун бўлса ҳам боғчага беришингиз мумкин ва бу вақт ичида ишни бажарасиз. Сизнинг уйда жойлашганингиз ишда эмаслигингизни билдирмайди, шунинг учун буни сиз бошидан бошқаларга – турмуш ўртоғингизга, болаларга, дугоналарингизга тушунтиришингиз керак.
Манба: «Гармония жизни»
Изоҳ (0)