Америкалик сиёсатшунос ва давлат арбоби Збигнев Бжезинский 89 ёшида вафот этди. Бу ҳақда New York Times маълум қилди, дея хабар беради «Газета.uz».
Збигнев Бжезинский польшалик дипломат оиласида туғилган, ўтган асрнинг 50-йилларида АҚШ фуқаролигини олганди. У сиёсат соҳасидаги фаолияти билан обрў қозонди: тадқиқотлари ва таҳлилий мақолалари нафақат мутахассислар, балки давлат арбоблари қизиқишига ҳам сабаб бўлганди.
Тадқиқотларининг катта қисмини АҚШ ташқи сиёсати ва собиқ Иттифоқ тузуми таҳлилига бағишлади. 1977—1981 йилларда АҚШ президенти Жимми Картернинг миллий хавфсизлик масалалари бўйича маслаҳатчиси бўлиб ишлади.
Умрининг охирги йилларида дарс ва маслаҳатлар бериш билан шуғулланди. Қатор жамоат ташкилотларини бошқарди, бир неча фонд ва компаниялар раҳбариятига кирди, телевидениеда сиёсий дастурларни олиб борди.
Вашингтондаги стратегик ва халқаро тадқиқотлар маркази эксперти, нуфузли «Бильдерберг клуби» доимий аъзоси эди.
— 2003 йил ноябрида у Ўзбекистонга келганди. Ўшанда Биринчи Президент Ислом Каримов билан учрашган, Жаҳон иқтисодиёти ва дипломатия университетида маъруза қилганди. Ўзининг «Буюк шахмат ўйини» номли китобида Ўзбекистон Марказий Осиёнинг юраги эканлиги ҳақида ёзганди. Збигнев Бзежинский доим Ўзбекистонга катта эҳтиром билан ёндашган, — дея хотирлайди Халқаро пресс-клуб раиси Шерзод Қудратхўжаев.
Изоҳ (0)