26 май, жума куни Ироқ Ҳарбий-ҳаво кучлари Мосул шаҳрига маҳаллий аҳолини ИШИД жангарилари қўлидаги тарихий шаҳар марказини тарк этишга чорловчи варақалар ташлаб кетди. Бу ҳақда Reuters агентлигига таяниб, «РИА Новости» хабар берди.
«Ироқ Ҳарбий-ҳаво кучларининг самолётлари ҳали озод этилмаган ҳудудлардаги маҳаллий аҳолини шаҳарни хавфсиз коридор орқали тарк этишга чорловчи юз минглаб варақаларни ташлади», — дея келтирилади армия баёнотида.
Ҳарбийлар варақалар орқали тез орада ҳудудга ҳужум уюштиришлари ҳақида огоҳлантирган.
Save the Children халқаро нодавлат ташкилоти Ироқ ҳукуматининг ҳаракатидан ташвишда эканлигини билдирди. Чунки жанговар ҳаракатларни амалга ошириш маҳаллий аҳолини хавф остида қолдиради.
Ироқлик ҳарбийларнинг ИШИД жангариларига қарши операциялари 2016 йилнинг октябридан бери АҚШ бошчилигидаги коалиция ёрдамида давом этмоқда.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)