Ўзбекистонда Samsung компаниясининг янги Galaxy S8 Plus модели сотила бошлади, деб хабар берди «Mobinfo.uz».
Қурилма ўзининг бир нечта янги функциялари билан ажралиб туради. Масалан, янги модель дисплейида кўзнинг рангдор пардаси сканери мавжуд. Пастки ҳошиянинг қалинлиги камайтирилгани сабаб «Уйга» тугмачасига жой қолмаган, шунинг учун Galaxy S тарихида биринчи бор ушбу тугмача сенсорли қилиб ишлаб чиқарилди, бармоқ сканери эса орқа қопқоққа — камерадан ўнг тарафга кўчирилди.
Моделнинг дисплейи деярли бутун фронтал томонини эгаллаган. Galaxy S8+ смартфонига 6,2 дюймли ва Super AMOLED 2960х1440 пикселли дисплей ўрнатилган. Фойдаланувчилар Galaxy S7/S7 Edge’даги каби созламалар орқали экран ўлчамини тўғрилаш имкониятига эга. У ерда учта вариант мавжуд: HD+ (1480х720), Full HD+ (2220х1080) ва WQHD+ (2960х1440).
Galaxy S8 Plus’нинг асосий жиҳатларидан бири овозли Bixby ассистентининг мавжудлиги. У бошқа дастурлар функцияларига тақлид қилади ва айнан ўша дастурни ёқмасдан туриб уларнинг вазифасини бажаради.
Смартфонга 64 разрядли 8 ядроли, 2,5 гигагерс частотали Exynos 8895 процессори ўрнатилган.
Тезкор хотираси 4 гигабайтга тенг. Дастурлар, суратлар, видеолар, мусиқалар ва бошқа маълумотларни сақлаш учун 64 Гбли ички хотира мавжуд. Galaxy S8’нинг камераси каби S8 Plus’нинг ҳам асосий камераси 12 мегапикселга тенг. Фронтал камераси эса 8 мегапикселга «кўтарилган» бўлиб замонавий стандартларга жавоб беради.
Смартфон Samsung Experience 8.1 интерфейсли Android 7.0 Nougat операцион тизимида ишлайди. Ўлчамлари: 169,6 х 73,4 х 8,1 миллиметр. Оғирлиги 173 грамм.
Тошкентдаги савдо дўконларида 64 Гб ички хотирага эга Galaxy S8 Plus’нинг нархи 6,6 миллион сўмдан сотилмоқда. Galaxy S8’нинг (64 Гб) нархи 5,8 миллион сўм.
Номи келтирилган қурилмани кўрсатилган нархда сотиб олишга «Дарё» нашри кафолат бермайди. Қурилмалар ва уларнинг нархлари ҳақидаги ахборот фақат танишиш учун тақдим этилган.
Изоҳ (0)