O‘zbekistonda Samsung kompaniyasining yangi Galaxy S8 Plus modeli sotila boshladi, deb xabar berdi “Mobinfo.uz”.
Qurilma o‘zining bir nechta yangi funksiyalari bilan ajralib turadi. Masalan, yangi model displeyida ko‘zning rangdor pardasi skaneri mavjud. Pastki hoshiyaning qalinligi kamaytirilgani sabab “Uyga” tugmachasiga joy qolmagan, shuning uchun Galaxy S tarixida birinchi bor ushbu tugmacha sensorli qilib ishlab chiqarildi, barmoq skaneri esa orqa qopqoqqa — kameradan o‘ng tarafga ko‘chirildi.
Modelning displeyi deyarli butun frontal tomonini egallagan. Galaxy S8+ smartfoniga 6,2 dyuymli va Super AMOLED 2960x1440 pikselli displey o‘rnatilgan. Foydalanuvchilar Galaxy S7/S7 Edge’dagi kabi sozlamalar orqali ekran o‘lchamini to‘g‘rilash imkoniyatiga ega. U yerda uchta variant mavjud: HD+ (1480x720), Full HD+ (2220x1080) va WQHD+ (2960x1440).
Galaxy S8 Plus’ning asosiy jihatlaridan biri ovozli Bixby assistentining mavjudligi. U boshqa dasturlar funksiyalariga taqlid qiladi va aynan o‘sha dasturni yoqmasdan turib ularning vazifasini bajaradi.
Smartfonga 64 razryadli 8 yadroli, 2,5 gigagers chastotali Exynos 8895 protsessori o‘rnatilgan.
Tezkor xotirasi 4 gigabaytga teng. Dasturlar, suratlar, videolar, musiqalar va boshqa ma’lumotlarni saqlash uchun 64 Gbli ichki xotira mavjud. Galaxy S8’ning kamerasi kabi S8 Plus’ning ham asosiy kamerasi 12 megapikselga teng. Frontal kamerasi esa 8 megapikselga “ko‘tarilgan” bo‘lib zamonaviy standartlarga javob beradi.
Smartfon Samsung Experience 8.1 interfeysli Android 7.0 Nougat operatsion tizimida ishlaydi. O‘lchamlari: 169,6 x 73,4 x 8,1 millimetr. Og‘irligi 173 gramm.
Toshkentdagi savdo do‘konlarida 64 Gb ichki xotiraga ega Galaxy S8 Plus’ning narxi 6,6 million so‘mdan sotilmoqda. Galaxy S8’ning (64 Gb) narxi 5,8 million so‘m.
Nomi keltirilgan qurilmani ko‘rsatilgan narxda sotib olishga “Daryo” nashri kafolat bermaydi. Qurilmalar va ularning narxlari haqidagi axborot faqat tanishish uchun taqdim etilgan.
Izoh (0)