Алишер Усмонов томонидан Дмитрий Медведевнинг курсдоши раҳбарлик қилувчи «Соцгоспроект» жамғармасига 50 миллион долларлик активларнинг берилиши Илья Гавриловнинг 2010 йилда миллиардерга Рублёвкадаги ер майдонини сотган «Ист Инвест гуруҳи» билан битимнинг бир қисми бўлган. Бу ҳақда Гавриловнинг ўзи маълум қилди, деб ёзади «РБК».
Коррупцияга қарши кураш фонди (ККФ) 2 март куни эълон қилган текширувда Илья Елисеев ҳамда у билан боғлиқ «Дар» ва «Соцгоспроект» фондлари Медведевнинг манфаатлари йўлида фаолият юритаётганлиги айтилади. Фонд, Бош прокуратурага ушбу фонддаги қонунбузарликлар ҳақида берган аризада таъкидланишича, 2010 йил августида «Соцгоспроект» бизнесмен Алишер Усмоновдан хайрия шартномаси бўйича бепулга Рублёвкада жойлашган ҳовлини қабул қилиб олган. «Усмоновнинг тадбиркорлик фаолияти давлат шартномалари, шунингдек, Медведев қабул қиладиган норматив ҳужжатларга боғлиқ бўлгани туфайли, 5 миллиард рубллик кўчмас мулкнинг бу тарзда берилиши пора ҳисобланади», — дейилади аризада.
ККФ Тергов қўмитасидан пора олиш ва пора бериш моддалари бўйича жиноий иш қўзғашни сўради.
Гавриловнинг айтишича, Алишер Усмонов ўз қароргоҳини кенгайтирмоқчи бўлиб, унга ёндош 12 гектарлик ҳудудни сотиб олиш мақсадида Гавриловга мурожаат қилган. У Илья Елисеевнинг «Соцгоспроекти» билан ўша ерда девелоперлик лойиҳасини амалга ошириш ҳақида битим тузгани, шу туфайли, ер майдонини сота олмаслигини айтган.
Гаврилов Усмоновга шарт қўйиб, Елисеевнинг фонди билан боғлиқ масалани тартибга солишни сўраган. «Агар улар лойиҳадан воз кечса ва сиз менга яхши нархни таклиф қилсангиз, шунда мен ерни сотишга розиман», — деган у. Усмонов «Соцгоспроект» билан «яхшигина» товон пули ҳақида келишиб олган. Шундан сўнг ер Усмоновга сотилган.
2010 йил 2 ноябрдаги олди-сотди шартномасига кўра, Усмонов Рублёвкадаги жами ҳудуди 11,5 гектарлик ер майдони учун «Ист Инвест Гуруҳи»га 60 миллион рубль ёки ўша вақтдаги курс бўйича 2 миллион доллар тўлаган.
Девелоперлик лойиҳасидан воз кечганлиги учун товон пули сифатида «Соцгоспроект» «биз лойиҳани амалга оширишдан даромад сифатида олишни кўзда тутган суммага тенг» активларни қўлга киритди, деди нашр суҳбатдоши Знаменскоедаги ер майдони ва уйни назарда тутиб, айнан улар ККФ текширувида пора деб аталган эди.
Изоҳ (0)