Ўзбекистон Республикаси Президентининг Давлат маслаҳатчиси бошчилигида Бухоро ва Навоий вилоятлари аҳолиси билан очиқ мулоқот ўтказилди

Ўзбекистон Республикаси Президентининг Давлат маслаҳатчиси Турсинхон Худойбергенов бошчилигидаги республика ишчи гуруҳи аъзолари 16—21 май кунлари Бухоро ва Навоий вилоятлари аҳолиси билан очиқ мулоқот тарзида сайёр қабул ўтказди. Бу ҳақда «Дарё»га тадбир мутасаддилари маълум қилди.Сайёр қабулда вазирликлар, шаҳар ва туман ҳокимликлари, прокуратура, ички ишлар, суд органлари раҳбарлари ҳамда бошқа тегишли бошқарма ва ташкилотлардан 200 га яқин мутасадди иштирок этди.

Тадбирларда таъкидланганидек, бугунги кунга келиб Бухоро ҳамда Навоий вилоятларида истиқомат қилувчи аҳолидан жами 64 мингдан зиёд мурожаат келиб тушган. Хусусан, Бухоро вилоятидан – 35 минг, Навоий вилоятидан эса – 29 минг.Мазкур вилоятлардан келган мурожаатларнинг асосий қисми уй-жой олиш ва уй-жой қуриш учун ер ажратиш (14,4 фоиз), меҳнат ва бандлик (10,4фоиз), моддий ёрдам, иш ҳақи, пенсия таъминоти ҳамда болалар нафақасини олиш (8,3 фоиз), суд қарорларининг ижро этилиши (5,3 фоиз), банк-молия ва солиққа тортиш (5,9 фоиз), судларда жиноят ишлари, фуқаролик ишлари, хўжалик судларида ишлар кўрилиши (7,5 фоиз), таълим соҳасига оид (3,2 фоиз), электр таъминоти масаласи, шу жумладан, электр энергиясини ўчирилиши ва асоссиз қарздорлик ҳисобланиши (1,8 фоиз) каби соҳаларга оид.

Шу билан бирга, тадбирда таъкидланганидек, мазкур вилоят ҳокимликлари мансабдор шахслари томонидан қонунчилик талабларига зид равишда фуқаролар ва юридик шахслар томонидан юборилган мурожаатларни ўз вақтида кўриб чиқмаслик ва муаллифга жавоб бермаслик, сифатсиз ўрганиш каби ҳолатларга тизимли равишда йўл қўйиб келиш амалиёти давом этмоқда.

Жумладан, вилоят ҳокимликларида мурожаатлар билан ишлаш тизимини тўғри ташкил этмаслик, мурожаатларни тақсимлаш ва назорат қилиш ишларига малакали кадрларни жалб этмаслик ҳамда таҳлил ишларини йўлга қўйилмаслик оқибатида Бухоро вилоятида жами 1000 га яқин, Наовий вилоятида 300 дан зиёд муддати ўтган мурожаат мавжуд.

Сайёр қабуллар давомида Бухоро ҳамда Навоий вилоятлари аҳолисининг 900 дан зиёд мурожаати жойида кўриб чиқилиб, 75 фоизга яқини ижобий ҳал этилди.

Мисол тариқасида 67 та ижро ҳужжатлари юзасидан 209,5 миллион сўмлик, жумладан, 52,1 миллион сўмлик алимент ундириш ҳақидаги суд қарорлари ижро этилиши, соғлиқни сақлаш соҳасида 115 та мурожаатнинг ижобий ҳал этилиши, хусусан, 10 та ногиронлик аравачаси берилиши, 62 та даволаниш учун ордерлар ажратилиши, 17 та ҳолатда ногиронлик белгиланиши, 12 нафар фуқарога автомобиллар етказиб берилиши ҳамда 32 та автомобиль учун шартномалар тузилганини таъкидлаш лозим.

Учрашувлар якунида кўриб чиқилган барча мурожаатлар бўйича вилоят ва туман даражасидаги мутасадди идора ва ташкилотларга тегишли кўрсатмалар берилди.