O‘zbekiston Respublikasi Prezidentining Davlat maslahatchisi Tursinxon Xudoybergenov boshchiligidagi respublika ishchi guruhi a’zolari 16—21-may kunlari Buxoro va Navoiy viloyatlari aholisi bilan ochiq muloqot tarzida sayyor qabul o‘tkazdi. Bu haqda “Daryo”ga tadbir mutasaddilari ma’lum qildi.
Sayyor qabulda vazirliklar, shahar va tuman hokimliklari, prokuratura, ichki ishlar, sud organlari rahbarlari hamda boshqa tegishli boshqarma va tashkilotlardan 200 ga yaqin mutasaddi ishtirok etdi.
Tadbirlarda ta’kidlanganidek, bugungi kunga kelib Buxoro hamda Navoiy viloyatlarida istiqomat qiluvchi aholidan jami 64 mingdan ziyod murojaat kelib tushgan. Xususan, Buxoro viloyatidan – 35 ming, Navoiy viloyatidan esa – 29 ming.
Mazkur viloyatlardan kelgan murojaatlarning asosiy qismi uy-joy olish va uy-joy qurish uchun yer ajratish (14,4 foiz), mehnat va bandlik (10,4foiz), moddiy yordam, ish haqi, pensiya ta’minoti hamda bolalar nafaqasini olish (8,3 foiz), sud qarorlarining ijro etilishi (5,3 foiz), bank-moliya va soliqqa tortish (5,9 foiz), sudlarda jinoyat ishlari, fuqarolik ishlari, xo‘jalik sudlarida ishlar ko‘rilishi (7,5 foiz), ta’lim sohasiga oid (3,2 foiz), elektr ta’minoti masalasi, shu jumladan, elektr energiyasini o‘chirilishi va asossiz qarzdorlik hisoblanishi (1,8 foiz) kabi sohalarga oid.
Shu bilan birga, tadbirda ta’kidlanganidek, mazkur viloyat hokimliklari mansabdor shaxslari tomonidan qonunchilik talablariga zid ravishda fuqarolar va yuridik shaxslar tomonidan yuborilgan murojaatlarni o‘z vaqtida ko‘rib chiqmaslik va muallifga javob bermaslik, sifatsiz o‘rganish kabi holatlarga tizimli ravishda yo‘l qo‘yib kelish amaliyoti davom etmoqda.
Jumladan, viloyat hokimliklarida murojaatlar bilan ishlash tizimini to‘g‘ri tashkil etmaslik, murojaatlarni taqsimlash va nazorat qilish ishlariga malakali kadrlarni jalb etmaslik hamda tahlil ishlarini yo‘lga qo‘yilmaslik oqibatida Buxoro viloyatida jami 1000 ga yaqin, Naoviy viloyatida 300 dan ziyod muddati o‘tgan murojaat mavjud.
Sayyor qabullar davomida Buxoro hamda Navoiy viloyatlari aholisining 900 dan ziyod murojaati joyida ko‘rib chiqilib, 75 foizga yaqini ijobiy hal etildi.
Misol tariqasida 67 ta ijro hujjatlari yuzasidan 209,5 million so‘mlik, jumladan, 52,1 million so‘mlik aliment undirish haqidagi sud qarorlari ijro etilishi, sog‘liqni saqlash sohasida 115 ta murojaatning ijobiy hal etilishi, xususan, 10 ta nogironlik aravachasi berilishi, 62 ta davolanish uchun orderlar ajratilishi, 17 ta holatda nogironlik belgilanishi, 12 nafar fuqaroga avtomobillar yetkazib berilishi hamda 32 ta avtomobil uchun shartnomalar tuzilganini ta’kidlash lozim.
Uchrashuvlar yakunida ko‘rib chiqilgan barcha murojaatlar bo‘yicha viloyat va tuman darajasidagi mutasaddi idora va tashkilotlarga tegishli ko‘rsatmalar berildi.
Izoh (0)