Хабар қилинганидек, «Ўзавтосаноат» АК ва Peugeot Citroen гуруҳи ўртасида Ўзбекистонда енгил тижорат автомобилларини ишлаб чиқарувчи қўшма корхона барпо этиш бўйича келишув имзоланди. Мазкур янгилик Франция оммавий ахборот воситаларида ҳам кенг ёритилмоқда, дея хабар беради «Жаҳон» ахборот агентлиги.
Жумладан, LesEchoс нашри «Жиззах» ЭИЗда бунёд этиладиган Uzbekistan Peugeot Citroen Automotive қўшма корхонаси лойиҳасига жалб этиладиган умумий инвестициялар ҳажми 130 миллион евро, низом капитали эса 30 миллион еврони ташкил этилишини билдирди.
Boursier.com PSA Peugeot Citroen гуруҳи томонидан янги технологиялар, интеллектуал мулкдан фойдаланиш, шунингдек, замонавий ишлаб чиқариш линиялари ва ходимларни ўқитиш имконияти тақдим этилиши ҳақида ёзади. Завод ишлаб чиқаришни бошқариш, маҳсулот сифати, етказиб бериш ва савдо масалаларида Peugeot Citroen’нинг замонавий тизими бўйича иш олиб боради. Шу билан бирга, автомобиль эҳтиёт қисмларини ишлаб чиқарувчи маҳаллий корхоналарни жалб қилиш йўли билан биринчи йилнинг ўзидаёқ янги қўшма корхонада 50 фоиз маҳаллий маҳсулотлардан фойдаланиш кўзда тутилган.
Tradingsat.com гуруҳ вице-президенти Кристоф Бержераннинг янги лойиҳа ҳақидаги фикрларига эътибор қаратган.
«Лойиҳа Push tо Pass (5 йиллик ривожланиш режаси) стратегик режамизга тўлиқ мос келади. Бу PSA гуруҳи бизнесининг енгил тижорий транспорт сегменти ва минтақада даромадни ошириш учун ажойиб имконият, — дейди Кристоф Бержеран. — Peugeot Citroen қўшма корхона дунёга келишида асосий омил бўлган Ўзбекистон Президенти Шавкат Мирзиёевнинг шахсий қўллаб-қувватлаши ва ўзбек шериклари билан ўрнатилган конструктив мулоқотни юқори баҳолайди».
Изоҳ (0)