Арктика учун мослаштирилган формали кийим-кечак яқинда Норвегияда бўлиб ўтган ўқув машғулотлари чоғида америкалик ҳарбийларга панд берди, деб ёзади «РИА Новости».
Март бошида Россия-Норвегия чегараси яқинида бўлиб ўтган Joint Viking 2017 машғулотларида икки юзга яқин АҚШ денгиз пиёдалари қатнашди. Уларнинг аслаҳа-анжомлари минус 45 даражадан паст ҳароратга яхши чидам бермаслиги маълум бўлди.
Швециянинг қишки ҳарбий кийим ишлаб чиқарадиган Torraka фирмаси вакили Йонас Райдем айтишича, америкалик ҳарбийлар учун кийим тайёрловчилар қаттиқ совуқда танадан чиқаётган намлик кийим қаватларида музлаб қолишини ҳисобга олмайди.
Америкалик ҳарбийлар Норвегияда бошқа муаммоларга ҳам дуч келган. Чунончи, устки кийимнинг чоклари сўкилган, молниялар ўтмай қолган, оёқ кийимлар чанғининг маҳкамловчи мосламаларидан чиқиб кетган, пластик рюкзаклар эса ёрилган.
Генерал-майор Нил Нельсон бундай камчиликларнинг барчаси ҳисобга олинишини айтди. «12 йил чўлда бўлганимиздан кейин, энди бизни бошқа дарслар кутмоқда. Биз чўл учун аъло кийим-кечакларни яратдик, аммо улар манфий ҳароратга бардош беролмайди», — дея эътироф этди у.
Изоҳ (0)