Тинч океанидаги одам яшамайдиган Хендерсон кичик ороли сайёрадаги энг ифлосланган жой деб топилди. Бу ҳақда «РИА Новости» АҚШ Миллий фанлар академиясига таяниб хабар берди.
Тасмания университети ва Буюк Британия Қушларни ҳимоя қилиш қироллик жамияти билан биргаликда тайёрланган маърузага кўра, Янги Зеландия ва Лотин Америкаси қирғоқлари оралиғида жойлашган Хендерсон оролида бир квадрат метрга тўғри келадиган ахлат зичлиги энг юқори бўлиб чиққан. Мутахассислар ҳисоб-китобларига кўра, ифлосланиш зичлиги ҳар бир квадрат метр учун 671 та объектни ташкил қилади. Оролнинг майдони 4,3 гектарга тенг.
Тадқиқотчилар аниқлашича, оролга тушиб қолган объектларнинг умумий сони 37,7 миллионтани ташкил этади, ахлатнинг умумий оғирлиги 17,6 тоннага тенг. Шу билан бирга, 10 метр кенгликдаги пляжга ҳар куни ўртача 27 та янги объект келиб қолади.
Маъруза муаллифлари қайд этишича, ушбу вазиятга ўтган асрнинг иккинчи ярмида пластик ишлаб чиқариш кескин ўсгани сабабчи бўлган.
Изоҳ (0)