Қозоғистонлик талаба Руслан Туленов 2009 йилдан бери Хитойдаги ўқиш даври давомида 5000 миллилитр қон топширди. Бу ҳақда China Daily’га таяниб, «Казинформ» хабар берди.
Руслан Туленов Хитой Халқ Республикаси раиси Си Цзиньпиннинг 2013 йилда Қозоғистонга ташрифи доирасида Назарбоев университетига борган маҳал у ҳақида гапирганидан сўнг машҳур бўлиб кетди. Руслан хитойликлар «панда қони» деб атайдиган резус-манфий (одамларнинг 15 фоизида учрайди) қонга эга. Си Цзиньпиннинг сўзларига кўра, Руслан кўплаб хитойлик беморларга ёрдам берган.
25 ёшли қозоғистонлик бир йилда икки марта қон топширади. Шу кунгача топширган қони бутун танасидаги қон миқдорига тенг.
Руслан Туленов 2009 йилда Хитой тилини Хайнань университетида ўрганишни бошлаган, кейинроқ эса Пекин фан ва технология университетига ўқишга кирган.
«Бир дўстим йилда икки маротаба қон топширишини айтганидан сўнг, мен ҳам қон топшира бошладим. Менда одамларга ёрдам бериш мақсадида қон топшириш истаги туғилди. Бу мен учун муҳим. Онам менга шундай тарбия берган», — дейди Руслан.
Хитой раисининг Қозоғистонга ташрифидан сўнг, Хайнань университети раҳбарияти Руслан Туленовга Қозоғистон ва Хитой алоқаларини мустаҳкамлашга қўшган ҳиссаси учун 100 минг юань (16 340 доллар) миқдорида пул мукофотини топширди.
Изоҳ (0)