АҚШ президенти Дональд Трамп Россия ташқи ишлар вазири Сергей Лавров билан учрашув чоғида махфий маълумотни ошкор қилган, деб ёзади «Газета.ru». ABC News каналининг аноним манбаларига кўра, гап ИШИД жангариларининг АҚШга йўл олаётган самолётни портлатиш режалари ҳақида борган.
АҚШ жангариларнинг режалари ҳақидаги ахборотни улар орасидаги исроиллик жосусдан олган. У Америка томонига террорчилар АҚШга қараб учаётган рейсда портлаш уюштирмоқчи эканлигини ва портловчи қурилмани самолёт бортига ноутбукда олиб кирмоқчи эканлигини айтган. АҚШда ушбу маълумотни ишончли деб топишди, шу туфайли ҳукумат Европадан келаётган рейсларга ноутбук олиб чиқишни тақиқлаб қўйди.
Энди Трамп бу маълумотни Россия вазирига ошкор этган экан, исроиллик жосуснинг ҳаёти хавф остида, дея таъкидлади телеканал. АҚШ Миллий аксилтеррорчилик маркази собиқ раҳбари Мэтт Олсен айтишича, бундан кейин жангарилар режалари ҳақидаги бошқа ахборот манбалари ҳам хавф остида.
«Россия ИШИДга қарши коалицияга кирмайди. У бизнинг шеригимиз эмас», — деди Олсен Трампнинг жангарилар режалари ҳақидаги ахборотни Лавров билан бўлишгани хато бўлганига ишора қилар экан.
Америка президентининг ўзи эса твитларида руслар билан ҳар қандай маълумотни бўлишишга тўла ҳақ-ҳуқуқли эканлигини ёзмоқда.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)