Олий ва ўрта махсус таълим ҳамда Халқ таълими вазирликлари, «Маҳалла» ва «Нуроний» жамғармалари, сиёсий партиялардан бири ҳамкорлик асосида маҳаллаларда «Хизмат — беминнат» қўшимча бепул таълим бериш ўқув курсларини ташкил этиш бўйича меморандумни имзолади. Бу ҳақда «Дарё»га ишончли манбалардан бири маълум қилди.
Мазкур ҳамкорлик қуйидаги шаклларда амалга оширилади:
Маҳаллаларда истиқомат қилаётган уюшмаган ёшлар, фанлардан ўзлаштириши паст, шунингдек кам таъминланган оилалардан бўлган ўқувчиларга бепул қўшимча таълим бериш;
Бепул таълим бериш истагини билдирган кўнгилли республика, халқаро ва жаҳон миқёсидаги мусобақалар, олимпиадалар, танловлар ва конкурсларнинг номдор ғолиблари, «Йилнинг энг яхши фан ўқитувчиси» кўрик-танлови совриндорлари, маҳаллаларда истиқомат қилаётган нафақадаги кўп йиллик тажриба ва касбий маҳоратга эга бўлган педагогларни жалб этиш;
«Хизмат — беминнат» ўқув курсларини ташкил этиш учун зарур шарт-шароитлар яратиш, ушбу мақсадда ҳомийларни жалб этиш;
Чет тиллари, кимё, физика, математика, ахборот технологиялари, спорт, мусиқа, тасвирий ва амалий санъат, соғлом турмуш тарзи бўйича ўқув дастурларини ишлаб чиқиш;
Таълим, маданият ва спорт соҳаларида ўтказиладиган кўриклар, танловлар, фестиваллар ва бошқа тадбирларда ўқув курслари тингловчиларининг иштирок этишига кўмаклашиш;
Иқтидорли ва истеъдодли ёшлар ҳамда устоз мураббийларнинг имкониятларидан унумли фойдаланиш ва уларни ижтимоий фойдали фаолиятга жалб этиш;
Ёшларни тарбиялаш масалалари юзасидан таълим муассасалари ва бошқа муассасалар билан ҳамкорлик қилиш.
Мазкур меморандумни амалга ошириш мақсадида томонлар «Хизмат — беминнат» ўқув курслари фаолиятини ташкил этиш бўйича ташкилий қўмита тузадилар. Ташкилий қўмита ва ўқув курслари ўз фаолиятини тасдиқланган иш тартиби бўйича юритади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)