Қорақалпоғистон Республикаси Ички ишлар вазирлиги Пост-патруль хизмати ва Жамоат тартибини сақлаш бошқармаси Кинология хизмати томонидан Республика ҳудудида жиноятчиликка қарши курашиш, содир этилган жиноятларни иссиқ из билан фош этишда, шунингдек, кўча ва жамоат жойларида, оммавий тадбирларни ўтказиш жойларида жамоат тартибини сақлаш, фуқаролар хавфсизлигини таъминлаш мақсадида қатор тадбирлар ўтказилмоқда, деб хабар берди «KRuz.uz».
Қорақалпоғистон Республикаси Ички ишлар вазирлиги ППХ ва ЖЦБ Кинология хизмати бошлиғи майор Б.Тулекбаевнинг хабар беришича, хизмат итлари ёрдамида 2017 йил 4 апрель куни соат тахминан 10:30 да Нукус шаҳридаги Б.Алламбергенов кўчаси бўйидан жасад топилган. Воқеа тезкор-тергов гуруҳи томонидан ўрганилиб, қурбон Нукус шаҳри Чимбой эли кўчасида яшовчи Фарҳод (исмлар ўзгартирилган) исмли шахс эканлиги, унинг бош қисмига номаълум шахслар томонидан жароҳат етказиши оқибатида ўлдирилганлиги аниқланди.
Мазкур ҳолат бўйича воқеа жойига зудлик билан вазирлик ППХ ва ЖЦБ Кинология хизматидан тажрибали ходим кичик сержант Ш.Жарекеев ўзига бириктирилган Гарри лақабли хизмат ити билан чиқарилди. Хизмат ити ёрдамида ушбу жиноятни Нукус шаҳри 22-кичик туманида яшовчи Александр амалга оширганлиги аниқланиб қўлга олинди. Бу ҳолат бўйича Ўзбекистон Республикаси Жиноят Кодексининг 97-моддаси 1-банди балан жиноий жавобгарликка тортилди.
2017 йил 16 апрель куни соат тахминан 17:30 да Нукус шаҳри А.Хожалепесов кўчасида яшовчи Шерзод якка тинтув ўтказилганида унинг ёнидан 12,79 грамм марихуана наркотик моддаси топилган. Шерзоднинг ҳозирги вақтда яшаш уйи тезкор-тергов гуруҳи ҳамда вазирлик ППХ ва ЖЦБ Кинология хизмати ходими, сафдор Х.Гайпов ўзига бириктирилган Кинг лақабли хизмат ити билан тинтув қилганида, уйдан сотиш учун яшириб қўйилган 29,76 грамм марихуана наркотик моддаси топилган.
Бу ҳолат бўйича Шерзод Ўзбекистон Республикаси Жиноят Кодексининг 273-моддаси 5-банди балан жиноий жавобгарликка тортилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)