Oliy va o‘rta maxsus ta’lim hamda Xalq ta’limi vazirliklari, “Mahalla” va “Nuroniy” jamg‘armalari, siyosiy partiyalardan biri hamkorlik asosida mahallalarda “Xizmat — beminnat” qo‘shimcha bepul ta’lim berish o‘quv kurslarini tashkil etish bo‘yicha memorandumni imzoladi. Bu haqda “Daryo”ga ishonchli manbalardan biri ma’lum qildi.
Mazkur hamkorlik quyidagi shakllarda amalga oshiriladi:
Mahallalarda istiqomat qilayotgan uyushmagan yoshlar, fanlardan o‘zlashtirishi past, shuningdek kam ta’minlangan oilalardan bo‘lgan o‘quvchilarga bepul qo‘shimcha ta’lim berish;
Bepul ta’lim berish istagini bildirgan ko‘ngilli respublika, xalqaro va jahon miqyosidagi musobaqalar, olimpiadalar, tanlovlar va konkurslarning nomdor g‘oliblari, “Yilning eng yaxshi fan o‘qituvchisi” ko‘rik-tanlovi sovrindorlari, mahallalarda istiqomat qilayotgan nafaqadagi ko‘p yillik tajriba va kasbiy mahoratga ega bo‘lgan pedagoglarni jalb etish;
“Xizmat — beminnat” o‘quv kurslarini tashkil etish uchun zarur shart-sharoitlar yaratish, ushbu maqsadda homiylarni jalb etish;
Chet tillari, kimyo, fizika, matematika, axborot texnologiyalari, sport, musiqa, tasviriy va amaliy san’at, sog‘lom turmush tarzi bo‘yicha o‘quv dasturlarini ishlab chiqish;
Ta’lim, madaniyat va sport sohalarida o‘tkaziladigan ko‘riklar, tanlovlar, festivallar va boshqa tadbirlarda o‘quv kurslari tinglovchilarining ishtirok etishiga ko‘maklashish;
Iqtidorli va iste’dodli yoshlar hamda ustoz murabbiylarning imkoniyatlaridan unumli foydalanish va ularni ijtimoiy foydali faoliyatga jalb etish;
Yoshlarni tarbiyalash masalalari yuzasidan ta’lim muassasalari va boshqa muassasalar bilan hamkorlik qilish.
Mazkur memorandumni amalga oshirish maqsadida tomonlar “Xizmat — beminnat” o‘quv kurslari faoliyatini tashkil etish bo‘yicha tashkiliy qo‘mita tuzadilar. Tashkiliy qo‘mita va o‘quv kurslari o‘z faoliyatini tasdiqlangan ish tartibi bo‘yicha yuritadi.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)