Канадада қадимий океан қолдиқлари топилди

Олимлар Канададаги Онтарио провинциясидан таркиби жиҳатдан қадимий океанга ўхшаш, бундан 2 миллиард йил олдин мавжуд бўлган кўлни аниқлади. Бу ҳақда «Корреспондент.net» хабар берди.

Таъкидланишича, Ердаги қадимий океаннинг таркиби темирга бой, олтингугурт эса кам бўлган. Сув таркибини ўрганган олимларнинг қайд этишича, сувлар мунтазам аралашиб туришига қарамасдан ундаги бактерия ва кимёвий элементлар деярли ўзгармай қолади.

Олимлар баъзи кўллар сувининг кислородсиз қатламидан углерод ва метан билан «озиқланадиган» ўзига хос Methyococcaceae бактерияларини аниқлаган.

Олимлар қайд этишича, сувнинг бундай таркиби бундан 4 миллиард йил олдин мавжуд бўлган Архей океанига хос тизимларнинг умумий хусусияти бўлиши мумкин. Бундан ташқари олимлар сув таркибидан темир элементини топган, бу эса оксидланиш жараёнига олиб келган.

Биологларнинг айтишича, бу каби кўл нафақат Канадада, балки Индонезия ва Шарқий Африкада ҳам бўлиши мумкин. Ушбу кашф этилган кўл жуда муҳим топилма ҳисобланади, чунки у Ерда ҳаёт пайдо бўлиши ва эволюция жараёни ҳақида маълумот беради.

«Дарё»нинг Telegram’даги расмий канали — @toshqindaryo’га аъзо бўлинг!