Германия саудиялик ҳарбийларни ўз ҳудудида ўқитиши маълум қилинди

Германия Саудия Арабистонининг террорчиликка қарши курашида кўмаклашади ва мамлакат ҳарбийларини ўз ҳудудида ўқитади. Бу ҳақда Саудияда ташриф билан бўлиб турган Германия канцлери Ангела Меркель маълум қилди, дея хабар беради «ТАСС». 

«Саудия Арабистони минтақадаги муҳим давлат ва ИШИДга қарши курашаётган коалициянинг узвий бир қисми ҳисобланади. Биз бу мамлакат чегаралари ҳимояланган, Саудия армияси эса жангариларга қарши кураш учун яхши тайёргарликдан ўтган бўлишидан манфаатдормиз. Шу сабабли турли йўналишлар, жумладан, ҳарбий хизматчилар, чегарачилар ва аёл полициячиларни Германияда ўқитиш масаласида келгусида ҳамкорлик қиламиз», — дея таъкидлади Ангела Меркель. 

Эслатиб ўтамиз, олдинроқ Саудия Арабистони расмийлари Меркель «барча саудиялик аёллар учун ўрнак» ҳисобланишини айтганди. 

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.

«Дарё»нинг Telegram’даги расмий канали — @toshqindaryo’га аъзо бўлинг!