Тошкент шаҳар ИИББ томонидан маълум қилинишича, Шайхонтоҳур ва Яшнобод туманида электр тармоқлари корхонасининг тўрт нафар ходими фуқаролардан маълум хизматларни кўрсатиш учун пул талаб қилгани билан боғлиқ жиноятлар фош этилди.
2017 йил 14 апрелда Шайхонтоҳур туманида яшовчи фуқаро тикув цехи ишлатиш учун зарур бўлган юқори кучланишли электр манбаига уланиш ва ҳужжатларни расмийлаштириш учун электр тармоқлари корхонаси ходимлари 12400000 сўм миқдордаги пул маблағини талаб қилаётгани ҳақида Тошкент шаҳар ИИББга шикоят аризаси билан мурожаат қилган.
Ҳолат юзасидан тезкор тадбир ўтказилиб 2017 йил 14 апрелда Шайхонтоҳур тумани ҳудудида ички ишлар идоралари ходимлари томонидан туман электр тармоқлари корхонаси ходимлари Исмоилов Акром ва Рашидов Азиз талаб қилинган маблағни олаётган вақтда далилий ашёлар билан қўлга олинган.
Ҳолат юзасидан прокуратура идоралари томонидан Жиноят Кодексининг 168-моддаси учунчи қисми а банди, яъни фирибгарлик жинояти аломатлари билан иш қўзғатилган.
2017 йил 19 апрелда Шайхонтоҳур туманида яшовчи яна бир фуқаро Тошкент шаҳар ИИББга ариза билан мурожаат қилган. Фуқаронинг аризасига кўра, у Яшнобод тумани ҳудудидан сотиб олмоқчи бўлган хонадоннинг электр токи бўйича қарздорлиги йўқлиги ҳақидаги маълумотни олмоқчи бўлганда туман электр тармоқлари корхонасининг ходими ундан 1300000 сўм миқдордаги пул маблағини талаб қилган.
Шу куннинг ўзида Яшнобод тумани ҳудудида ички ишлар ходимлари томонидан ўтказилган тадбирда Яшнобод тумани электр тармоқлари корхонаси ходимлари Жаҳонгир Шоаҳмедов ва Аҳмаджон Йўлдошев талаб қилинган 550 минг сўм ва 100 АҚШ доллари миқдоридаги пул маблағларини олаётган вақтда далилий ашёлар билан қўлга олинган.
Ҳолат юзасидан суриштирув ишлари олиб борилмоқда.
Тошкент шаҳар ИИББ, агар кимдир мазкур шахслардан жабр кўрган бўлса, ички ишлар идораларига мурожаат қилишни сўрайди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)