Санкт-Петербург метросида содир этилган теракт буюртмачиси аниқланди. Бу ҳақда Россия Федерал хавфсизлик хизмати бошлиғи Александр Бортников маълум қилди, деб хабар берди «Интерфакс».
«Деярли аниқланди. Ҳа, ҳа, аниқланди», — дейди Бортников «Интерфакс» журналисти берган саволга жавобан.
«Петербург метрополитенида содир бўлган терактга боғлиқ, террорчилар тайёргарлигига гувоҳлик берувчи барча нарсалар расман маълум қилинди. Сизларни иш тафсилотлари билан босқичма-босқич таништириб борамиз», — дея қўшимча қилди ФХХ бошлиғи.
3 апрель куни Санкт-Петербург метро поездида қўлбола бомбанинг портлаши оқибатида 15 киши, жумладан, террорчи дея тахмин қилинаётган шахс ҳам ҳалок бўлган, 50 дан ортиқ одам жароҳат олган. Тергов бомбани асли қирғизистонлик Акбаржон Жалилов амалга оширган дея ҳисобламоқда.
17 апрель куни ФХХ террорчи-худкушни тайёрлашда гумонланган 26 ёшли Аброр Азимовни Москва вилоятида қўлга олган эди.
19 апрель куни ФХХ Москвада Аброр Азимовнинг акаси — Акрам Азимовни ҳам қўлга олган.
Этник жиҳатдан ўзбек бўлган Аброр ва Акрам Азимовлар Қирғизистонннинг жанубида яшаган. 2013 йилда Россия фуқаролигини қабул қилган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)