Россия федерал хавфсизлик хизмати Санкт-Петербург метросидаги теракт иши бўйича Москвада Акрам Азимовни қўлга олди. У теракт ташкилотчиси деб гумон қилинаётган Аброр Азимовнинг акаси, деб хабар бермоқда «Коммерсантъ».
ФХХ маълумотларига кўра, Акрам Азимов терактга тайёргарлик кўриш давомида фойдаланилган пулларни ўтказиб беришда, шунингдек, халқаро террорчилар билан алоқа ўрнатишда кўмак берган. Қўлга олинган вақтида унинг ёнида жанговар граната бўлгани айтилмоқда.
СРОЧНО: ФСБ подтвердила задержание брата предполагаемого организатора теракта в метро Петербурга pic.twitter.com/d36vBmKLRm
— Пятый канал Новости (@5tv) April 19, 2017
Аввалроқ «Фонтанка» нашри терактнинг эҳтимолий ташкилотчиси Аброр Азимовнинг акаси терактга алоқадорлик масаласида текширувдан ўтказиш учун 18 апрель куни Москвага олиб келингани ҳақида хабар берган эди. Нашр Акрам Азимов Қирғизистонда қўлга олингани ҳақида ёзган эди. «Коммерсантъ» ахборотига кўра, Акрам Азимов Москвага 19 апрель куни Ўшдан юборилган эди.
Баъзи маълумотларга кўра, ака-ука Азимовлар Петербург теракти ижрочиси Жалиловни яхши билган. Ҳозирги вақтда махсус хизматлар теракт арафасида уларнинг учаласи Туркияда бўлиб, террорчи гуруҳлардан бирининг вакиллари билан учрашгани эҳтимоли юзасидан текширув олиб бормоқда.
Куни кеча Москва шаҳрининг Басманний туман суди Петербург теракти ташкилотчиси деб гумон қилинаётган асли қирғизистонлик Аброр Азимовни ҳибсга олиш ҳақида қарор чиқарган эди. У қамоққа олинишига қарши эмаслигини, бироқ бор-йўғи бировларнинг буйруқларини бажарганини айтиб ўтган эди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)