Буюк Британия бош вазири Тереза Мэй 8 июнь куни муддатидан аввалги парламент сайлови бўлиб ўтишини эълон қилди. Бош вазир буни «Мамлакатга Европа Иттифоқидан чиқиш учун барқарор парламент ҳамда кучли ҳукумат керак», — дея изоҳлади. Бу ҳақда «РБК» хабар бермоқда.
Ҳукуматнинг ушбу қарорини Тереза Мэй фуқароларга Лондондаги Даунинг-стрит қароргоҳи яқинидаги тезкор мурожаат вақтида эълон қилди.
Бош вазирнинг маълум қилишича, 19 апрель куни парламентга муддатидан аввалги сайлов ўтказиш бўйича қонун лойиҳасини тақдим этилади, ушбу лойиҳа қабул қилиниши учун овозларнинг учдан икки қисми керак бўлади.
Бундан аввалги парламент сайлови 2015 йилда бўлиб ўтган, навбатдагиси 2020 йилга мўлжалланган эди, деб ёзади Reuters.
Мэй сайлов ўтказиш заруратини мамлакат парламентида Буюк Британиянинг Европа Иттифоқидан чиқиши масаласи бўйича бирлик йўқлиги билан изоҳлади.
Иттифоқдан чиқиш масаласида ўтказилган 2016 йилги референдум вақтида мамлакат фуқаролари Brexit учун овоз берган эди.
«Британия Европа Иттифоқини тарк этади, бошқа йўл йўқ… Биз ўз валютамиз, қонунларимиз, чегараларимиз назоратини қайтарамиз ва эски дўст ва ҳамкорларимиз билан эркин равишда битимлар тузамиз», — деди бош вазир.
Мэйнинг сўзларига кўра, мухолифатнинг Лейбористик партияси Буюк Британия Европа Иттифоқидан чиқишидаги якуний келишувларни тўсиб қўйишни ваъда берган. Либерал-демократлар партияси қуйи палатанинг ишини фалажламоқда, Шотландия миллий партияси эса ҳукумат қилаётган ишга бутунлай қаршилик кўрсатмоқда.
Ҳозирда парламентдаги 650 ўриндан 330 таси Консерватив партиясига тегишли. Лейбористларда 232 та ўрин, Шотландия парламентида эса 54 ўрин, либерал-демократларда тўққиз ўрин бор.
Либерал-демократик партия етакчиси Тим Фаррон ўзининг партияси муддатдан аввалги сайлов ўтказиш тарафдори эканлигини маълум қилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)