Uber халқаро такси хизмати 2016 йил давомида 2,8 миллиард доллар миқдорда зарар кўрди, ваҳоланки компания йил давомида 6,5 миллиард доллар даромад олган эди, дея хабар бермоқда «Интерфакс».
Акциялари очиқ бозорда эълон қилинмайдиган компания, ундан аввалги йил натижаларини ошкор этмагани ҳолда, илк марта ўз молиявий кўрсаткичларини маълум қилди. Шу билан бирга Uber ўтган йилнинг тўртинчи чорагидаги даромад ҳажми ундан аввалги уч ойга нисбатан 74 фоизга — 2,9 миллиард долларгача ўсганини билдирди.
The Wall Street Journal нашрининг ёзишича, Uber 2008 йилда ташкил қилинганидан бери 15 миллиард доллар миқдорида қарзли ва ҳиссали молиялаштиришни амалга оширган. Компания фаолият доирасини кенг кўламда кенгайтириши ҳисобига кўрсатилган маблағдан фақат 7 миллиард долларга яқини қолган.
Uber — шахсий ҳайдовчили автомобилни қўнғироқ орқали чақириш бўйича мобил дастурни ишлаб чиқарувчи халқаро технологик компаниядир. Компания салкам 70 мамлакатда 570 дан ортиқ шаҳарда ўз химатларини кўрсатади. Uber МДҲ мамлакатлари орасида Россия, Беларусь, Озарбайжон, Қозоғистон ва Украинада фаолият олиб боради.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)