Тошкентнинг «Пахтакор» клуби стадиони «Локомотив»га қарши бўлиб ўтадиган ўйиндан кейиноқ ёпилиши мумкин, деб ёзди «Championat.asia» сайти. 21 апрель кунги ўйин ўтгач, стадионда реконструкция ишлари бошланиши кўзда тутилган.
Бу режага ўзгартириш киритилса, «Пахтакор» стадиони биринчи давра якунига қадар клуб учун хизмат қилиб, иккинчи давра олдидан барибир ёпилади ва жамоа ўз ўйинларини бошқа стадионда ўтказишга киришади. Қурилишнинг қанча давом этиши ва унинг сметаси борасида аниқ маълумотлар йўқ.
Стадиондан ташқари «Пахтакор» клуби учун замонавий моддий-техник спорт базаси қуриш ҳам режалаштирилган. Бу лойиҳа Тошкент шаҳар ҳокимлиги билан ҳамкорликда амалга оширилади. Бунда шаҳар ҳокимияти йил бошиданоқ шу ишни режалаштирганмиди ёки режа клуб Алишер Усмонов қўлига ўтгани ҳақидаги миш-мишлардан кейин пайдо бўлганми — аниқ эмас.
«Championat.asia»нинг қайд этишича, клуб яқин кунлар ичида янги маълумотларни тақдим этади. Унда «Пахтакор»нинг аввалги мавқесини тиклаши борасида сўз бориши мумкин.
«Пахтакор» фақатгина Тошкент билан чекланиб қолмай, катта футболдан четда қолаётган ҳудудларда ҳам болалар футболини тиклашни режалаштираётган бўлиши мумкин.
Аввалроқ Алишер Усмонов «Пахтакор» акционерига айлангани ҳақидаги хабарлар ҳеч қандай асосга эга эмаслиги клуб матбуот хизмати томонидан маълум қилинган, бироқ раддияда Алишер Усмонов номи тилга олинмаганди.
Маълумот учун, клуб стадиони бундан аввал ҳам реконструкция қилинганди.
2017 йилнинг айни вақтида эса «Пахтакор» клуби расмий сайти яна ишламаяпти. Сайт Алишер Усмонов борасида хабарлар тинимсиз чиқиб турган вақтда ҳам иш фаолиятида эмасди.
Изоҳ (0)