АҚШнинг Жоржия штати Атланта шаҳрида яшовчи 13 ёшли Малачи Хемфилл Instagram Live тўғридан-тўғри трансляцияси чоғида бехосдан ўзини ўлдириб қўйди. Бу ҳақда 11alive портали хабар берди.
Ўспирин трансляция вақтида ўз томошабинларига тўппончани кўрсатишга қарор қилган. Унинг онаси айтишича, оила аъзолари қулоқни қоматга келтирадиган товушни эшитиб, боланинг хонасига югуриб кирган ва уни ерда қонга беланиб ётган ҳолда кўрган. Йигитчани касалхонага етказишган, аммо шифокорлар унинг ҳаётини сақлаб қола олмаган.
Хемфиллнинг Instagram’да жонли эфирни томоша қилган дўстлари боланинг уйига бостириб келишди. Унинг онаси сўзларига кўра, уй олдига 50 га яқин бола тўпланиб, унинг аҳволи билан қизиққан.
Айни пайтда полиция вояга етмаган бола тўппончани қаердан олганини аниқлаштирмоқда. Онаси қуролни ўғлига унинг дўсти берганини, у эса ўз навбатида тўппончани номаълум кимсадан олганини қайд этди.
Изоҳ (0)