АҚШда суғурта компаниялари 11 сентябрь терактлари туфайли Саудия ташкилотларини судга берди

Американинг бир гуруҳ суғурта компаниялари Нью-Йоркнинг Манхэттен туман судига 2001 йил 11 сентябрь терактлари муносабати билан Саудия Арабистони банклари ва бошқа ташкилотларига қарши даъво берди, деб ёзади «ТАСС». Америка фирмалари жавобгарлардан камида 4,2 миллиард доллар ундириб олмоқчи.

Даъво аризасида таъкидланишича, Саудия Арабистонининг иккита банки, шунингдек, саккизта компанияси ва хайрия ташкилоти «Ал-Қоида» террорчилик тармоғини қўллаб-қувватлаган. Унинг жангарилари эса АҚШда 2001 йил 11 сентябрда 3 мингга яқин кишининг ўлимига сабабчи бўлган терактларни амалга оширган.

Ҳужжатда айтилишича, жавобгарлар кўмагисиз, «Ал-Қоида» террорчилари 11 сентябрь терактларини «муваффақиятли равишда режалаштириб, мувофиқлаштириб амалга ошира олмаган бўларди». Саудия тузилмаларидан суд жараёнини ўтказиш билан боғлиқ барча харажатларни қоплашни, шунингдек, камида 1,4 миллиард доллар ҳажмида товон пули тўлашни талаб қилишмоқда. Шу билан бирга, суд даъвогарлар фойдасига ҳукм чиқарса, АҚШдаги «Терроризмга қарши кураш тўғрисидаги қонун»га кўра, ушбу сумма автоматик тарзда уч баробар ошади ва 4,2 миллиард долларга тенг бўлади.

Эслатиб ўтамиз, ўтган йили Конгресс вакиллар палатаси АҚШда халқаро террорчи ташкилотлар уюштирган ҳужумлар қурбонлари оиласига уларни қўллаётган давлатларга нисбатан мамлакат ҳудудида даъво қўзғаш ҳуқуқини берувчи ҳужжатни имзолаган эди.

2017 йил 20 март куни эса 11 сентябрь терактларида қурбон бўлганларнинг қариндошлари Саудия Арабистонини судга бериб, қироллик ҳукуматини «Ал-Қоида» террорчилик тармоғини қўллаб-қувватлашда айблаган эди.