CNN: Британия разведкаси АҚШга Трамп жамоасининг Россия билан контактлари ҳақидаги маълумотларни топширди

Буюк Британия ва Европа разведка ҳамжамиятлари америкалик ҳамкасбларига Дональд Трамп жамоасининг россиялик мансабдорлар билан контактлари ҳақидаги «тасодифан» қўлга киритилган маълумотларни топширди. Бу ҳақда CNN АҚШ конгрессидаги ҳамда Британия ва Европа разведкаларидаги манбаларига таяниб хабар берди, деб ёзади «Газета.ru».

Разведка контактларни Россиянинг расмий шахслари ва Ғарб разведка хизматлари танийдиган бошқа россияликларни одатий текшириш чоғида «тасодифан» қўлга киритган. Ушбу контактлар бир неча ойлар давом этган. Европа разведкаси ахборотни америкалик ҳамкасбларига инглиз тилида сўзлашувчи мамлакатларнинг «Беш кўз» разведка альянси иши доирасида берган.

АҚШ сенатидаги манба ушбу маълумотлар ўрганилишини айтди. CNN таъкидлашича, эҳтимол, улар АҚШ президентлигига сайловларга «Россиянинг аралашуви» ҳақидаги текширувда ҳисобга олинади.