Пентагоннинг Суриядаги «Шайрат» авиабазасига берилган ракета зарбалари самарадорлиги ҳақидаги баёнотлари профессионаллар учун эмас, оддий америкаликларга мўлжалланган. Бу ҳақда Россия мудофаа вазирлиги маълум қилди, дея хабар беради «Ведомости».
Вазирликнинг расмий вакили Игорь Конашенковга кўра, авиазарбаларга ҳарбий аэродромнинг йирик хўжалик бино ва иншоотлари нишон бўлган.
«АҚШ авиазарбалари — қиймати 100 миллион доллардан ошиқ бўлган 59 та ‘Томагавк’ ракеталарининг йўллангани ИШИД ва ‘Жабҳат ан-Нусра’ каби террорчи ташкилотлар билан жанг олиб бораётган Сурия армияси салоҳиятига сезиларли таъсир кўрсатмади. Ҳукумат кучлари ўз мамлакатини террорчилардан озод қилишда давом этмоқда», — дея таъкидлади Конашенков.
Мудофаа вазирлиги мисол тариқасида Россиянинг аксилтеррор операцияси доирасидаги ҳаракатларини келтирган. Жумладан, жангариларнинг 74 та объектига 128 та қанотли ракета йўлланган. Уларнинг барчаси нишонга бориб теккан, объектлар ва террорчилар эса йўқ қилинган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)