«Чегара билмас шифокорлар» халқаро гуманитар ташкилотининг Сурияда ишлаётган ходимлари Идлиб вилоятининг Хон-Шайхун шаҳридаги жабрланувчиларда асаб тизимини фалаж қилувчи зарин гази билан заҳарланиш белгилари борлигини маълум қилди. Бу ҳақда «ТАСС» хабар бермоқда.
Айни вақтда, ташкилот ходимлари бошқа тиббиёт муассасаларида ҳам бўлиб, бир қатор беморларнинг либосидан оқартирувчи модда ҳиди келаётганини ҳам аниқлаган. «Мазкур маълумотлар Хон-Шайхунга берилган зарба жабрланувчилари камида иккита кимёвий модда таъсирига учраган, деган хулоса беради», — дейилади ташкилот хабарномасида.
Reuters агентлиги 4 апрель, сешанба куни Идлиб вилоятининг Хон-Шайхун шаҳрига Сурия ё Россия самолётлари томонидан берилган авиазарба оқибатида 58 киши, жумладан, 11 бола ҳалок бўлгани ҳақида хабар берди. Агентлик Сурия ҳукумат кучлари «заҳарловчи газдан фойдаланган бўлиши мумкинлиги»ни таъкидлади.
Россия ва Сурия ҳарбийлари Хон-Шайхунда юз берган воқеага алоқадорлигини рад этди. Кейинроқ Россия Мудофаа вазирлиги 4 апрель куни Хон-Шайхун атрофига Сурия авиацияси зарба бергани, зарбалардан бири жангариларнинг заҳарловчи моддалари сақланаётган қурол-аслаҳа омборига бориб тушганини маълум қилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)