Citigroup халқаро молиявий конгломерати тадқиқотига кўра, францияликларнинг аксарияти Франциянинг Европа Иттифоқидаги аъзолиги борасида худди Британияники каби референдум ўтказилишини хоҳлайди, дея хабар берди «Коммерсантъ».
Шу билан бирга, евро ҳудудидан чиқиб, миллий валюта — франкка қайтишни хоҳламайдиганлар кўпроқ қисмни ташкил қилди.
«Сўровда қатнашганларнинг 54 фоизи Европа Иттифоқига аъзолик бўйича референдум ўтказиш тарафдори. Бироқ сўровда иштирок этганларнинг 72 фоизи евродан воз кечиб, франкка қайтишга қарши эканликларини маълум қилди», — деб CNBC телеканали Citigroup изланишларидан парча келтирди.
«Миллий фронт» партияси етакчиси Марин Ле Пен президентлик сайловларида ғолиб чиқадиган бўлса, Франциянинг Европа Иттифоқига аъзолиги борасида референдум ўтказишга ваъда берган. Аммо кўплаб ижтимоий сўровлар натижаси Ле Пен янги президент бўла олмаслигини кўрсатмоқда.
«Биз ҳар бир номзоднинг ғалаба қозониш эҳтимолини қуйидагича деб ҳисоблаймиз: Франсуа Фийон — 40 фоиз, Эммануэль Макрон — 35 фоиз, Марин Ле Пен — 20 фоиз, Бенуа Хамон — 5 фоиз», — дейилади Citigroup тадқиқотида.
Изоҳ (0)