Польша россиялик диспетчерларни Лех Качиньский самолётининг фалокатида айблади

Польша бош прокуратураси мамлакат собиқ президенти Лех Качинскийнинг Ту-154 самолётини Смоленск шаҳридаги фалокатини қасддан уюштирганликда гумон қилинаётган россиялик диспетчерлар ҳамда «учинчи шахс»га нисбатан айблов эълон қилди, дея хабар беради «Коммерсантъ».

Юқоридаги айблов билан бугун, 3 апрель куни Польша бош прокурори ўринбосари Марек Пошченек Варшавадаги матбуот анжуманида чиқиш қилди.

«Тергов давомида прокурорлар авиадиспетчерлар ҳамда парвозларни бошқариш минорасидан туриб кўплаб инсонларнинг ҳаётига зомин бўлган фалокатни қасддан уюштирган учинчи шахсга нисбатан айблов эълон қилиши учун етарлича далиллар қўлга киритилди», — дейди Польша прокуратураси вакили.

Шунингдек, Польша Россияга авиадиспетчерларни сўроқ қилишда ҳуқуқий ёрдам кўрсатишни таъминлаши бўйича сўров юбориш ниятида, деб қўшимча қилди Пошченек.

Россия президентининг матбуот котиби Дмитрий Песков Кремль Польшанинг айбловига қўшилмаслигини маълум қилди.

Бортида Польша президенти Лех Качиньский ва мамлакат раҳбарияти вакиллари бўлган Ту-154 самолёти 2010 йил 10 апрелда Россиянинг Смоленск аэродромига қўниш чоғида қулаган. Саккиз нафар экипаж аъзоси ва 88 йўловчининг барчаси ҳалок бўлган. «Дарё»нинг Telegram’даги расмий канали — @toshqindaryo’га аъзо бўлинг!