Халқ депутатлари туман Кенгашининг йигирманчи сессиясида Олий Мажлис Қонунчилик палатаси депутати Зумрад Бекатова, Халқ депутатлари туман Кенгаши депутатлари, туман ҳокими ўринбосарлари, ҳуқуқни муҳофаза қилиш органлари ҳамда кун тартибидаги масалаларга алоқадор корхоналар, муассасалар, овул ва маҳалла фуқаролар йиғинлари раислари, жамоатчилик ташкилотлари раҳбарлари иштирок этди. Сессияда Элликқалъа тумани ҳокими, Халқ депутатлари туман Кенгаши раиси Н.Худайбергенов раислик қилди. Бу ҳақда туман ҳокимлиги ахборот хизмати хабар бермоқда, деб ёзади «Қорақалпоғистон янгиликлари» нашри.
Кун тартибидаги биринчи масала бўйича Халқ депутатлари туман Кенгашининг «Аҳолига тиббий хизмат кўрсатишни, дори воситалари таъминотини янада яхшилаш, ушбу соҳадаги қонунчиликни амалиётга самарали тадбиқ этишга кўмаклашиш, шунингдек бу соҳада назоратни самарали амалга ошириш бўйича комиссияси» томонидан амалга оширилаётган ишлар тўғрисида комиссия раиси Набира Абдураманованинг ахбороти тингланди. Шундан сўнг Олий Мажлис Қонунчилик палатаси депутати З. Бекатова, туман тиббиёт бирлашмаси бошлиғи Р. Зарипов сўзга чиқиб ушбу соҳада амалга оширилаётган ишлар бўйича ўз фикр-мулоҳазаларини билдирди.
Сессия кун тартибидаги иккинчи масала бўйича Равшанбек Матчанов туман ҳокимининг иқтисодиёт ва тадбиркорлик масалалари бўйича биринчи ўринбосари, Валижон Ниязимбетов туман ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари ҳамда Маъмуржон Ҳасанов туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимларига тайинланиши ҳақидаги Қорақалпоғистон Республикаси Жўқорғи Кенгеси Раисининг фармойишлари тасдиқланди.
Депутатларга сессия кун тартибидаги масалалар бўйича қарор лойиҳалари тақдим этилди ва депутатлар томонидан бир овоздан маъқулланди.
Изоҳ (0)