Ироқнинг Мосул шаҳри ИШИД террорчилик ташкилоти жангариларидан баҳорда озод қилинади. Бу ҳақида Ироқ федерал полицияси қўмондонларидан бири, генерал Шокир ал-Хаважий «РИА Новости»га маълум қилди, дея хабар бермоқда «Коммерсантъ».
«Мосулни озод этилишига ҳали ҳафталаб вақт бор. Шу баҳорда сиз бу янгиликдан бохабар бўласиз», — деди ал-Хаважий. Унинг таъкидлашича, ҳозирда ИШИД Мосул ғарбининг 25—30 фоизини назорат қилиб турибди, ҳудудни озод қилиш ишлари давом этмоқда.
«Федерал полиция ҳозирча ‘эски шаҳар’ ҳудудига кирмади. Биз бу ишни ИШИД ўз қурол захирасини, қаршилик қила олиш қобилиятини батамом тугатиб бўлгач амалга оширмоқчимиз», — деди генерал.
Шунингдек, генерал Мосулда тинч аҳолининг ўлими билан боғлиқ ҳодисага АҚШ бошчилигидаги коалиция кучлари алоқадор эмаслигини айтиб ўтди
Унинг сўзларига кўра, одамлар коалициянинг нотўғри бомбардимонидан эмас, балки ИШИД томонидан портловчи ускуна ўрнатилган юк машинасининг портлаши оқибатида ҳалок бўлган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)