АҚШ разведка хизматлари ва ҳуқуқ-тартибот идоралари террорчи ташкилотлар, жумладан, ИШИД портловчи қурилмаларни самолёт бортига олиб ўтишнинг янги усулларини ишлаб чиқди, деб ҳисобламоқда. Бу ҳақда «Коммерсант.ru» маълум қилди.
CNN телеканали манбаларига кўра, жангарилар портловчи моддаларни электрон қурилмаларга яширишни ўрганиб олди, шу сабабли аэропортлардаги юкни сканердан ўтказиш тизимини доғда қолдириш мумкин.
Федерал қидирув бюроси террорчилар қўлига аэропортларда ўрнатилган замонавий хавфсизлик жиҳози келиб тушганлигидан ҳам хавотирда. Айнан шу каби маълумотлар АҚШ расмийлари март ойида самолётлар бортига гаджетлар олиб ўтишни ман этишига туртки бергани эҳтимолдан холи эмас.
Эслатиб ўтамиз, Буюк Британия АҚШдан сўнг узунлиги 16, эни ва қалинлиги эса тегишли равишда 9,3 ҳамда 1,5 сантиметрдан ортиқ бўлган исталган электрон қурилмани бортда олиб ўтишга тақиқ жорий этди. Техника багажга топширилиши лозим.
Чеклов 6 мамлакат — Туркия, Ливан, Иордания, Миср, Тунис ва Саудия Арабистонидан келадиган рейсларга тегишли.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)