Қирғизистон бош прокуратураси Давлат рўйхатга олиш хизмати раҳбари, мамлакатнинг собиқ бош вазир ўринбосари Тайирбек Сарпашевга нисбатан лавозимини суиистеъмол этишда гумон қилиб, жиноий иш қўзғади. Бу ҳақда «Интерфакс» хабар бермоқда.
Жиноий иш 2013 йили, Сарпашев бош вазир ўринбосари лавозимини эгаллаб турган пайтда 8 миллион сом (117 минг доллар) қийматидаги фуқаролик ҳолати далолатномалари бланклари харид қилиш учун тендер ўтказилиши бўйича қўзғатилди.
«Сарпашев Давлат рўйхатга олиш хизмати раҳбариятига бланкларни тендер ғолибидан эмас, танловда ютқазган иккинчи компаниядан сотиб олиш ҳақида кўрсатма беради. Кейинчалик мазкур бланклар нотўғри тайёрлангани, уларнинг микроматнида ‘Туғилганлик ҳақида гувоҳнома’ ўрнига ‘Никоҳни қайд этиш гувоҳномаси’ деб ёзилгани аниқланди», — дея маълум қилди прокуратура матбуот хизмати.
Бош прокуратурага кўра, бундай туғилганлик гувоҳномалари берилганидан сўнг Давлат рўйхатга олиш хизматига фуқаролардан бланклардаги хатолик бошқа давлатлар чегарасини кесиб ўтишда муаммолар туғдираётгани, Қирғизистонга қайтиб келишга мажбур бўлаётганлари ҳақидаги салкам 12 мингта шикоят келиб тушди.
Бугунги кунгача республикадаги ФҲДЁ бўлимлари томонидан 11690 та гувоҳнома алмаштириб берилди, қолган 28310 та гувоҳнома ҳам келгусида алмаштириб берилиши лозим. Бош прокуратура бундай хато бланклар тақдим этилиши орқали 40 минг бола ва уларнинг ота-оналари, шунингдек, давлат ва жамият манфаатларига зиён етказилганини билдирди.
Изоҳ (0)