Қорақалпоғистон Республикаси Вазирлар Кенгашида бўлиб ўтган мажлисда шаҳар ва туман ҳокимликлари ҳузуридаги вояга етмаганлар ишлари бўйича комиссияларнинг 2016 йилдаги фаолияти якунлари, ўрта махсус касб-ҳунар таълими муассасаларидаги ўқувчилар давомати ҳамда хорижга кетган ўқувчиларни ўқишга қайтариш масалалари муҳокама қилинди. Бу ҳақда «KRuz.uz» хабар бермоқда.
2016 йил давомида таълим муассасалари, маҳаллаларда вояга етмаганлар ўртасида жиноятчилик ва ҳуқуқбузарликларнинг олдини олиш мақсадида 5712 марта учрашув, давра суҳбатлари ўтказилганлиги таъкидлаб ўтилди. Вояга етмаганлар ўртасида жиноятчилик ва ҳуқуқбузарликларнинг олдини олиш бўйича келгусидаги чора-тадбирлар белгилаб олинди.
Мажлисда ўрта махсус касб-ҳунар таълими муассасаларидаги давомат, чет давлатларга кетган 68 нафар ўқувчини ўқишга қайтариш масаласи кўриб чиқилди. Хусусан, Тўрткўл туманида хорижга кетган ўқувчи ёшларнинг кўплаб учраётганлиги, дарслардаги давомат ачинарли ҳолда эканлиги қаттиқ танқид остига олинди. Ўқувчиларни ўқиш ҳамда яшаш жойларига зудлик билан қайтариш чораларини кўриш бўйича тегишли муассасаларга кўрсатма берилди.
Шаҳар ва туман ҳокимликлари ҳузуридаги вояга етмаганлар ишлари бўйича комиссиялар маъсул котиблари ўртасида ўтказилган «Йилнинг энг яхши масъул котиби» танлови якуни бўйича Шуманай тумани ҳокимлиги ҳузуридаги вояга етмаганлар ишлари бўйича комиссия масъул котиби А.Алланиязов ғолиб деб топилди ва фахрий ёрлиқ топширилди.
Изоҳ (0)