Ўзбекистон Президенти Шавкат Мирзиёев Навоий вилоятига ташриф Қизилтепа туманидаги «Ванғози агро» фермер хўжалиги шийпонида бўлиб, вилоятда қишлоқ хўжалигида амалга ошириладиган истиқболли лойиҳалар билан танишди. ЎзАнинг ёзишича, Президент бу ерда минг бош қорамол ва минг бош эчки боқишга мўлжалланган чорвачилик комплекси ҳамда сутни қайта ишлаш заводи ташкил этиш лойиҳасини ҳам кўздан кечирди.
Лойиҳа қиймати 18 миллиард сўм бўлган ушбу мажмуа учун 510 гектар ер майдони ажратилиши режалаштирилган. Ушбу мажмуада йилига 3 минг 650 тонна сут ва 150 тонна гўшт етиштириш, 6 минг тонна сутни қайта ишлаш кўзда тутилмоқда. 200 иш ўрни яратилади. Комплекс 2018 йилда тўлиқ ишга туширилади.
Жорий йилда Халқ банки томонидан Навоий вилоятининг Навбаҳор, Қизилтепа, Нурота туманларида қорамол ва наслдор эчки парваришлашга мўлжалланган яна 5 лойиҳа амалга оширилади. Натижада вилоятда сут етиштириш йилига 7 минг 700 тонна, гўшт етиштириш 480 тоннага ортади. Қўшимча 173 иш ўрни ташкил этилади.
Томорқалардан самарали фойдаланиш бўйича аҳоли билан суҳбатлар ўтказиш керак. Хонадонларда 100 бошдан парранда боқишни йўлга қўйиш, иссиқхоналарда лимон, унаби экиб, даромад олишни одамларга сингдириш лозим. Аҳолининг ўз томорқасидан фойдаланиб, даромад топишга иштиёқи кучайса, уларнинг фаровонлиги ортади. Халқ бой бўлса, давлат ҳам бой бўлади.Тумандаги Тўдакўл сув омбори ҳавзасида Вьетнам технологияси асосида йилига минг тоннадан зиёд балиқ балиқ етиштириш мўлжалланмоқда. Натижада вилоятда йилига балиқ етиштириш кўрсаткичи 8,5 минг тоннага етказилади.Шавкат Мирзиёев, Ўзбекистон Президенти
Тумандаги «Аква Тўдакўл» масъулияти чекланган жамияти қўшма корхонаси томонидан балиқ чавоғи етиштирувчи инкубацион цех, 250 тонналик музлаткичли омборхона, минг тонна балиқни қайта ишлаш, 400 тонна балиқ филеси ҳамда 350 тонна ярим тайёр маҳсулот ишлаб чиқариш цехлари ташкил этилиши режалаштирилган. «Ипотекабанк» кредити эвазига янги ҳавзалар қазиш ва уларда сув таъминотини яхшилаш учун хориждан махсус техника ва механизмлар, насослар сотиб олинади.
Лойиҳанинг умумий қиймати 18,7 миллиард сўм бўлиб, шундан 13,3 миллиард сўми банк кредитлари, 5,4 миллиард сўми корхона маблағидир. Ушбу лойиҳа аҳолига сифатли балиқ маҳсулотлари етказиб бериш, 90 га яқин иш ўрни яратиш имконини беради.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)