Ўзбекистон Президенти Шавкат Мирзиёев Кармана туманидаги Мустақиллик массивида барпо этилаётган қулай, арзон ва замонавий уй-жойлар, профилактика инспекторлари учун яшаш жойи, давлат идоралари раҳбарлари учун қурилган хизмат уйлари билан танишди. Бу ҳақда ЎзА хабар бермоқда.
Қишлоқ жойларда қурилаётган намунавий лойиҳалар асосидаги замонавий массивлар Ўзбекистон қиёфасини тубдан ўзгартириб, аҳоли турмуш фаровонлигини юксалтиришга хизмат қилмоқда. Жорий йилда Навоий вилоятида янгиланган намунавий лойиҳалар асосида 1 минг 185 уй-жой қурилиши режалаштирилган.
Навоий вилояти Кармана тумани «Талқоқ» маҳалла фуқаролар йиғинида янгиланган лойиҳалар асосида 32 хонадонга мўлжалланган икки қаватли ва 46 оила учун 2 сотихли уйлар барпо этилди.
Бугун мазкур маҳаллада 1 минг 23 хонадон бўлиб, аҳоли сони қарийб 5 мингга етди. Замонавий уйларда истиқомат қилаётганларнинг аксарияти ёш оилалардир.
Президентнинг 2016 йил 22 декабрдаги «Маҳаллий ҳокимликлар ва давлат органларининг ҳудудий бўлинмалари раҳбарлари учун хизмат уй-жойларини қуриш чора-тадбирлари тўғрисида»ги қарорига асосан Навоий вилоятида 2017—2018 йилларда 105 хизмат уйи қурилиши белгиланган бўлиб, жорий йилда 60 уй-жой учун пудратчилар танланиб, қурилиш ишлари жадал суръатларда олиб борилмоқда.
Кармана тумани раҳбарлари учун Мустақиллик массивида 9 хизмат уйидан 4 тасида қурилиш тугалланиб, коммуникация тармоқларига уланди. Қолган 5 уй Ўзбекистон мустақиллигининг 26 йиллиги арафасида фойдаланишга топширилади.
Ўзбекистон Президенти янгиланган намунавий лойиҳалар асосидаги замонавий уй-жойлар билан давлат идоралари раҳбарлари учун хизмат уйлари ёнма-ён қурилаётгани халқ билан мулоқот ва инсон манфаатларини таъминлашда муҳим аҳамият касб этишини таъкидлади.
2017 йилда профилактика инспекторлари учун 2 сотих бўлган ер участкаларида 3 хонали 94 уй-жой қурилиши режалаштирилган бўлиб, ушбу уй-жойларни қуриш учун 12,2 миллиард сўм маблағ ажратилади.
Бугунги кунда намуна сифатида Кармана тумани Мустақиллик массивида битта уй қуриб битказилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)