Жан-Клод Юнкер: Трампнинг мамлакатларни Евроиттифоқдан чиқишга чақириғи Болқонда урушга сабаб бўлиши мумкин

АҚШ президенти Дональд Трамп томонидан мамлакатларнинг Евроиттифоқдан чиқиши маъқулланиши ҳалокатли оқибатларга олиб келиши мумкин. Бу ҳақда Европа комиссияси раиси Жан-Клод Юнкер Financial Times газетасига берган интервьюсида маълум қилди, дея хабар беради «Коммерсант.ru».

Юнкерга кўра, бундай давъатлар Европа бирлигига раҳна солади ва Ғарбий Болқонда уруш келтириб чиқариши мумкин.

«АҚШ вице-президенти Майкл Пенс билан мулоқотда унга ‘бошқаларни Евроиттифоқдан чиқишга чақирманглар, агар бу тузилма тарқалиб кетса, янги урушга дуч келамиз’, деб айтдим. Европанинг жафокаш қисми учун ягона имконият — Евроиттифоқ истиқболига эга бўлиш. Агар биз Босния ва Герцеговина, Серб республикаси, Македония, Албанияни ўз ҳолига ташлаб қўйсак, яна уруш бошланади», — дея таъкидлади Жан-Клод Юнкер.

Эслатиб ўтамиз, Дональд Трамп АҚШ президентлигига номзод бўлиб турган пайт Буюк Британиянинг Евроиттифоқдан чиқишини маъқуллаган эди.

«Дарё»нинг Telegram’даги расмий канали — @toshqindaryo’га аъзо бўлинг!