Польшада қарийб 500 та коммунистик ёдгорликни йўқ қилиш бўйича қонун лойиҳаси ишлаб чиқилди

Польшада декоммунизация тўғрисидаги қонунга киритилиши мумкин бўлган янги тузатишлар сабаб, коммунизмга атаб ўрнатилган 500 та ёдгорлик йўқ қилиниши мумкин. Бу ҳақда, Польшанинг Rzeczpospolita газетасига таяниб, «Коммерсант.ru» хабар бермоқда.

Янги тузатишларга кўра, «коммунизмни улуғловчи» ёдгорликлар ҳамда ёдгорлик тошлари бузиб ташланади. Газетанинг ёзишича, бундай ёдгорликлар сони мамлакат бўйлаб 490 та атрофида. Қонун қабристонлар ҳамда жамоат эътиборига ҳавола этилмаган ёдгорликларга тааллуқли эмас.

2016 йил май ойида Польша президенти Анжей Дуда кўчалар, бинолар ва бошқа жамоат иншоотларига ном беришда коммунизм «ёки бошқа тоталитар тузумни» тарғиб қиладиган воситалардан фойдаланишни тақиқловчи қонунни имзолаган эди.

Қонунга изоҳ сифатида келтирилган қўчимчада жамоат жойлари, хусусан, кўчалар, кўприк ҳамда майдонларга ўзини-ўзи бошқариш ҳудудий органлари томонидан қўйиладиган номлар «коммунизм ёки бошқа тоталитар тузумни тўғридан тўғри ёки бошқа усуллар билан тарғиб қилувчи инсон, ташкилот, воқеа ёки саналарни абадийлаштириши мумкин эмас»лиги кўрсатиб ўтилган.

«Дарё»нинг Telegram’даги расмий канали — @toshqindaryo’га аъзо бўлинг!