Ўзбекистон Республикаси Олий Мажлиси Қонунчилик палатасининг навбатдаги мажлисида Ҳаракатлар стратегиясига мувофиқ амалга оширилаётган ислоҳотларни ҳуқуқий жиҳатдан таъминлашга қаратилган қонун лойиҳалари муҳокама қилинди. Бу ҳақда палата ахборот хизмати хабар бермоқда.
Ўзбекистон Республикаси Президенти томонидан кейинги ойларда «Суд-ҳуқуқ тизимини янада ислоҳ қилиш, фуқароларнинг ҳуқуқ ва эркинликларини ишончли ҳимоя қилиш кафолатларини кучайтириш чора-тадбирлари тўғрисида», шунингдек, «Ўзбекистон Республикаси суд тизими тузилмасини тубдан такомиллаштириш ва фаолияти самарадорлигини ошириш чора-тадбирлари тўғрисида»ги фармонлар қабул қилинди.
Парламент аъзолари таъкидлаганларидек, суд тизими бенуқсон ишлаши зарур. Ўзбекистон Республикаси Конституцияси, «Судлар тўғрисида»ги Қонун ва бир қатор процессуал кодексларга киритилаётган, янгидан ташкил этилаётган маъмурий ва иқтисодий судларнинг ҳуқуқий асосини яратиш, ишларни кўриб чиқиш тартибини соддалаштирадиган ўзгариш ва қўшимчалар шунга қаратилган.
Шунингдек, депутатлар томонидан «Ўзбекистон Республикаси Судьялар олий кенгаши тўғрисида»ги Қонун қабул қилинди. Бугунги кунга қадар Судьяларни танлаш ва лавозимларига тавсия этиш бўйича олий малака комиссияси фаолиятини аниқ ҳуқуқий мақомга эга бўлмаган ҳолда, жамоатчилик асосида амалга оширар, судьяларни рағбатлантириш ёки уларга нисбатан интизомий жавобгарлик чоралари кўриш ваколатларига эга бўлмаган. Мазкур қонун ушбу камчиликлар ўрнини тўлдиради ва конституциявий орган мақоми берилган Ўзбекистон Республикаси Судьялар олий кенгашининг фаолиятини тартибга солади.
Депутатлар сиёсий партияларнинг 2016 йилда ўз фаолиятини молиялаштириш манбалари тўғрисидаги ҳисоботларини тинглади. Мазкур масала бўйича барча сиёсий партиялар раҳбарлари сўзга чиқди.
Мажлис давомида Олий Мажлис Қонунчилик палатаси ваколатларига тааллуқли бошқа масалалар ҳам кўриб чиқилди. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)