Ўзбекистоннинг Душанбе шаҳридаги элчихонасига Тожикистон ҳукумати ҳузуридаги Фавқулодда вазиятлар ва фуқаро муҳофазаси қўмитаси раиси Рустам Назарзода номидан миннатдорлик мактуби келди. Бу ҳақда Ўзбекистон ТИВ матбуот хизмати хабар бермоқда.
Рустам Назарзода ўз мактубида йил бошида ёғингарчилик кўп бўлгани ва 500 дан ортиқ катта қор кўчкиси рўй бергани оқибатида жабрланган Тожикистон аҳолисига Ўзбекистондан юборилган инсонпарварлик ёрдами учун миннатдорлик билдирган.
Аввалроқ Ўзбекистон Фавқулодда вазиятлар вазирлиги 7 март куни Тожикистон аҳолиси учун озиқ-овқат маҳсулотлари, дори воситалари, қурилиш материаллари, кўмир, иссиқ кийим ва биринчи эҳтиёж учун зарур бўладиган бошқа товарлардан иборат 60 тоннадан зиёд юкни етказиб берган эди.
Рустам Назарзода Ўзбекистон Фавқулодда вазиятлар вазирлигига ҳам ташаккурнома йўллаган. Унда, жумладан, шундай дейилади:
Тожикистон халқи мамлакат ҳудудида рўй берган кенг миқёсли фавқулодда вазият муносабати билан Ўзбекистон томонидан кўрсатилган бирдамлик ва берилган самимий ёрдамни юксак қадрлайди. Ушбу ёрдам фақат ҳаёт учун зарур моддий буюмлар бўлгани учунгина эмас, балки аввало, ўзбек халқи томонидан кўп асрлик дўстлик ва ҳамкорлик ришталаримизнинг ифодаси сифатида кўрсатилган катта маънавий кўмак экани билан ҳам аҳамиятлидир.Рустам Назарзода, Тожикистон ҳукумати ҳузуридаги Фавқулодда вазиятлар ва фуқаро муҳофазаси қўмитаси раиси
Мавзуга доир: Ўзбекистон Тожикистоннинг қор кўчкиларидан жабрланган аҳолисига инсонпарварлик ёрдамини жўнатди
Изоҳ (0)