Давлат рақобат қўмитаси Тадқиқотлар маркази, Қимматли қоғозлар депозитарийси ва «Тошкент» Республика фонд биржаси билан ҳамкорликда Ўзбекистон Республикасида 2017—2018 йилларда иккиламчи фонд бозорини ривожлантириш концепциясини ишлаб чиқди.
Концепциянинг асосий мақсади – Ўзбекистонда эмиссия қилинадиган корпоратив қимматли қоғозларнинг, шунингдек акциялар ва облигацияларнинг иккиламчи бозорини ривожлантириш учун зарур шарт-шароитларни яратиш имконини берувчи стартегия ва йўналишларни белгилашдан иборат.
2017—2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида капитални жалб қилиш ва корхоналар, молия институтлари ва аҳолининг эркин ресурсларини жойлаштиришнинг муқобил манбаси сифатида фонд бозорини ривожлантириш кўзда тутилган.
Шундан келиб чиққан ҳолда, Концепция қимматли қоғозлар иккиламчи бозорини ривожлантириш бўйича ҳаракатлар стратегияси ва унинг бозор муносабатлари шароитида фаолият кўрсатиш механизмини янада такомиллаштириш, республика иқтисодий тузилмасини эркинлаштириш борасидаги ғоялар, нуқтаи-назарларни белгилаб берди.
Бундан ташқари, қимматли қоғозлар айланишида нормал шароитларни вужудга келтириш, қимматли қоғозлар олди-сотдиси орқали иқтисодиётга инвестиция киритиш учун қулай шароитларни яратиш, савдолар ташкилотчилари ва фонд бозорининг профессионал иштирокчилари учун барқарор шарт-шароитларни яратишга йўналтирилди.
Мазкур ҳужжатда қимматли қоғозларнинг иккиламчи бозорини ривожланишига тўсқинлик қилаётган сабаблар чуқур таҳлил қилинган. Ушбу камчиликлар қимматли қоғозларнинг паст ликвидлилиги, ахборотни очишга нисбатан юзаки ёндашув, инвестициявий воситачилар ва фонд бозорининг профессионал қатнашчиларининг етарли эмаслиги ва бошқалардан иборат.
Шунингдек, Концепцияда республикамизда қимматли қоғозлар иккиламчи бозорининг ривожлантириш омиллари белгилаб берилган. Буларга ривожланишнинг ижобий макроиқтисодий кўрсаткичлари, бизнесни ташкил қилиш учун мавжуд муҳит ва қулай шарт-шароитлар, қимматли қоғозларнинг бирламчи ва ташкиллаштирилган бозорларини мавжудлиги, қимматли қоғозлар иштирокидаги операциялар бўйича солиқ имтиёзлари, профессионал иштирокчиларнинг эркин ҳарактланиши, ҳамда Корея фонд биржаси билан ҳамкорлик киради.
Ишлаб чиқилган Концепцияда иқтисодиётни ривожланишни бугунги кундаги босқичида қимматли қоғозлар бозорини ривожлантиришни стратегик қоидалари белгилаб берилган. Улар ўз ичига қимматли қоғозларнинг иккиламчи бозорини ривожлантиришга йўналтирилган давлат сиёсатини юритиш, зарурий ресурслар базасини яратиш, ривожланишнинг махсус дастурларини ишлаб чиқиш, солиқ сиёсати ва эмитентлар фаолияти тўғрисидаги ахборотлар шаффофлигини таъминлаш, қимматли қоғозлар ликвидлигини ошириш, корпоратив ҳаракатларни, шу жумладан қимматли қоғозлар бўйича даромад тўлашни такомиллаштириш, IPO лойиҳаларини ишлаб чиқиш, инфратузилма институтларини ривожлантириш, аҳолининг молиявий саводхонлигини ошириш ва бошқаларни олган.
Изоҳ (0)