Табиатни муҳофаза қилиш давлат қўмитаси Давлатбионазорат инспекцияси ва «Балиқчи» компанияси хавфсизлик хизмати ходимлари Тошкент вилоятининг Қуйичирчиқ туманидаги рейд давомида Сирдарёда ноқонуний балиқ овлаш ҳолатини аниқлади. Бу ҳақда «Газета.uz» хабар бермоқда.
Қўлга олинган браконьерлар балиқ овлашнинг энг хавфли ва зарарли қуролларидан бири — электр қармоқдан фойдалангани аниқланди. Ҳисоб-китобларга кўра, мазкур фаолият оқибатида давлатга етказилган зарар миқдори 42 миллион сўмни ташкил этади.
Оқ амур, зоғорабалиқ, товонбалиқ, дўнгпешона каби турларга мансуб 90 килодан ортиқ балиқ мусодара этилди. Ҳуқуқбузарларни жавобгарликка тортиш ва етказилган зарарни ундириш мақсадида прокуратурага топшириш учун материаллар тайёрланмоқда.
Давлатбионазорат инспекцияси раҳбарияти қарори билан мусодара этилган балиқ маҳсулотларининг барчаси Тошкент шаҳридаги А. Хлебушкина номли 22-меҳрибонлик уйига топширилди.
Эслатиб ўтамиз, Амударё ва Сирдарёда 10 мартдан 31 майгача, Қорақалпоғистон ва Хоразм вилояти сув ҳавзаларида 25 апрелдан 10 июнгача, мамлакатнинг бошқа сув ҳавзаларида эса 16 апрелдан 31 майгача балиқ овлашга вақтинча чеклов ўрнатилган. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)