Мудофаа вазирлиги вакиллари Қорақалпоғистон Халқ қабулхонаси тажрибасини ўрганди

Ўзбекистон Республикаси Президентининг Қорақалпоғистон Республикасидаги Халқ қабулхонасида ҳарбийлар билан учрашув бўлиб ўтди. Бу ҳақда ЎзА хабар бермоқда. 

Ўзбекистон Республикаси Президентининг Қорақалпоғистон Республикасидаги Халқ қабулхонасида бу ерга келувчилар учун барча қулайлик яратилган. Фуқароларни қабул қилиш, мурожаатларни кўриб чиқишда замонавий ахборот технологияларидан кенг фойдаланилмоқда. Ҳуқуқий адабиётлар, зарур маълумотлар билан таъминланган. 

Ана шу имкониятлар билан танишиш ва тажриба алмашиш мақсадида Ўзбекистон Республикаси Мудофаа вазирлиги ва унинг таркибидаги ҳарбий округлар, ўқув муассасалари раҳбарлари Халқ қабулхонасига ташриф буюрди. 

Учрашувда Ўзбекистон Республикаси Президентининг Қорақалпоғистон Республикасидаги Халқ қабулхонаси раҳбари Ҳ.Халимов иштирокчиларни халқ билан мулоқотни тизимли йўлга қўйиш, фуқароларни қабул қилиш, мурожаатларни расмийлаштириш тартиблари, улар ҳал этилишини назорат қилиш борасида олиб борилаётган ишлар билан таништирди. 

Халқ қабулхонаси ўз фаолиятини бошлагандан буён ўтган қисқа вақтда 1,5 мингдан зиёд фуқаро мурожаат қилган. Мурожаатлар қонунга мувофиқ белгиланган муддатларда, сифатли ва холисона кўриб чиқилмоқда. 

Яқин кунларда вазирлик ва унинг тасарруфидаги ҳарбий округларда Халқ қабулхоналарини ташкил этиш режалаштирилган. Биз бу ерда жисмоний ва юридик шахсларнинг мурожаатлари билан ишлаш тизимини, бу борада тўпланган тажрибаларни ўргандик.

Ш.Юсупов, Ўзбекистон Республикаси Мудофаа вазирлиги вакили, полковник