Москвада бўлиб ўтаётган MITT-2017 халқаро туризм кўргазмаси доирасида Ўзбекистон туризмни ривожлантириш давлат қўмитаси раиси А.Шаропов Россия туризм федерал агентлиги раҳбари О.Сафонов билан учрашди. Бу ҳақда қўмита матбуот хизмати хабар бермоқда.
Россия томони Ўзбекистонда туризм соҳасида юз бераётган ўзгаришлар, хусусан, давлат раҳбари томонидан туризмни қўллаб-қувватлаш ва ривожлантириш борасида қабул қилинган қарорлардан яхши хабардор эканлигини маълум қилди.
Федерал агентлик раҳбарияти Ўзбекистоннинг туризм салоҳиятини тарғиб қилиш ва илгари суриш учун турли тадбирларни ташкиллашга тайёрлигини билдирди. Шунингдек, О.Сафонов хорижий сайёҳларни жалб этиш бўйича ҳамкорликдаги туризм маҳсулотлари лойиҳасини ишлаб чиқишни таклиф этди.
Томонлар икки давлат сайёҳлик компаниялари ҳамкорлигини мустаҳкамлаш, уларнинг Ўзбекистон ҳамда Россияда бўлиб ўтадиган кўргазмаларда иштирокини таъминлаш ҳақида келишиб олди.
Изоҳ (0)