Ўзбекистон Республикаси ташқи ишлар вазири Абдулазиз Камилов Европада хавфсизлик ва ҳамкорлик ташкилоти Демократик институтлар ва инсон ҳуқуқлари бюроси директори Михаэль Георг Линкни қабул қилди. Ву ҳақда вазирлик матбуот хизмати хабар берди.
Михаэль Георг Линк ЕХҲТ ДИИҲБнинг мамлакатга ташриф буюрган делегациясига бошчилик қилмоқда. Музокаралар давомида Ўзбекистон ва бюро ўртасидаги ҳамкорлик масалалари юзасидан фикр алмашилди.
Қайд этилганидек, ўтган йили навбатдан ташқари бўлиб ўтган Ўзбекистон Президенти сайловини мониторинг қилишда таркибида узоқ муддатли ва қисқа муддатли кузатувчилари бўлган ДИИҲБнинг тўлиқ делегацияси иштирок этди. Миссия учун шароитлар яратилиб, сайлов жараёнини кузатиш учун уларга барча давлат органлари, фуқаролик жамияти институтлари ва сайлов участкаларида бўлиш имкони яратилди.
Ўзбекистон сайлов тизимини мустаҳкамлаш ва мукаммаллаштириш масалаларида ҳамда бошқа истиқболли йўналишларда конструктив ҳамкорликни давом эттиришдан томонлар манфаатдор эканлигини тасдиқланди.
Учрашувда ЕХҲТнинг Ўзбекистондаги лойиҳалари координатори Жон С. МакГрегор иштирок этди.
Изоҳ (0)