World of Tanks асосчилари Тошкентга келди. Улар билан ҳамкорликда ватанпарварликка хизмат қиладиган компьютер ўйинлари ишлаб чиқарилиши мумкин

Ўзбекистон Ахборот технологиялари ва коммуникацияларини ривожлантириш вазирлигида Беларуснинг Wargaming компанияси делегацияси билан учрашув бўлиб ўтди, дея хабар беради вазирликнинг ахборот хизмати.

Учрашувда меҳмонлар Wargaming компаниясининг компьютер ўйинларини ишлаб чиқариш ва уларни жаҳон миқёсида оммалаштириш бўйича муваффақиятли тажрибалари хусусида сўзлаб берди.

Томонлар ёшларда ватанпарварлик ғояларини сингдиришга хизмат қиладиган компьютер ўйинларини ишлаб чиқариш бўйича икки томонлама ҳамкорлик масалаларини муҳокама қилди.

Wargaming — компьютер ўйинларини яратиш бўйича жаҳондаги етакчи компаниялардан бири. 18 йиллик фаолияти давомида компания 15 дан зиёд турли платформаларга мўлжалланган ўйинларни ишлаб чиққан.

Улар орасида World of Tanks, World of Warplanes ва World of Warships компьютер ўйинлари Wargaming’нинг энг оммалашган маҳсулотлари ҳисобланади.

«Дарё»нинг Telegram’даги расмий канали — @toshqindaryo’га аъзо бўлинг!