Apple ходими iPhone’ни таъмирлайдиган махфий қурилма ҳақида гапириб берди
Apple компанияси собиқ ходимларидан бири «iPhone’ни калибрлаш учун машина» деб номланган қурилма суратини эълон қилди. Ускунадан компания қурилмаларига Apple Store дўконининг ўзидаёқ хизмат кўрсатишни амалга ошириш учун фойдаланилади, деб ёзади Motherboard.
«iPhone’ни калибрлаш учун машина» компаниянинг ҳар битта дўконига ўрнатилган, аммо унинг мавжудлиги ҳақида фақат баъзи кишиларгина билади. Манбанинг айтишича, ушбу қурилмалардан iPhone 5s чиқарилганидан кейин фойдаланишни бошлашган.
«У катта, қўпол қурилма эди, у худди гаражда ясалгандек таассурот уйғотарди», — деди Apple Genius техник кўмак маркази собиқ ходими.
Унинг сўзларига кўра, смартфонни ўрнатишдан олдин, машинани ярим соат давомида созлаш керак бўларди, унинг ичида эса хавфли ва фақат қўлқоп билан тегиш мумкин бўлган суюқлик бўлган.
Қурилма камера ва дисплейни калибрлай олади, шунингдек, Touch ID бармоқ изи сканерини тузата олади. Бундай имконият бошқа сервисларда мавжуд эмас.
