2011 йил 11 мартда Японияда юз берган цунами ва Фукусима АЭСдаги ҳалокат 18 мингдан ортиқ кишининг умрига зомин бўлган. Ҳалокатдан олти йил ўтиб, япон халқи ҳалок бўлганларни ёд этиш учун йиғилди. Бу ҳақда Le Monde нашри маълум қилди.
Нашр АЭСнинг ҳолатига алоҳида эътибор қаратди. Станция радиоактив моддаларни чиқармаслиги учун доимий совитиб турилади. TEPCO (The Tokyo Electric Power Company) оператори 1, 2, 3-реакторларга ҳар куни 325 куб метр сув қуяди. Қуйиладиган сув реакторларда 50 даражадан паст ҳароратни сақлаб туришга имкон беради. Муаммо шундаки, қуйиладиган сув станция остидаги ертўлаларга оқиб тушиб радиоактив моддаларга аралашади. Натижада станция остида 70 минг тонна заҳарланган сув йиғилган.
Ҳар куни иншоот остидан, тахминан, 500 куб метр сув тортиб олинади. Тортиб олинган сув қайта ишланиб, унинг бир қисми станцияни совитиш циклига жўнатилади. Фойдаланилмай қоладиган 200 куб метрга яқин сув тўплаш ҳудудига юборилади. Улкан тўплаш ҳудудида мингдан ортиқ резервуар (сув тўпланадиган захира ҳавзаси) жойлашган. Резервуарларда ҳалокат юз бергандан буён 800 минг тоннадан ортиқ сув тўпланган. Сувнинг бу миқдори 200 та олимпиада ҳавзасини тўлдиришга етади.
Бу ерда бошқа муаммо ҳам юзага келган. Шошилинч равишда қурилган кўп сонли резервуарлардан сув сизиб чиқа бошлаган. Улар босқичма-босқич мослаштирилган резервуарлар билан алмаштирилган.
Ер ости қатламидаги сувнинг океанга сизиб чиқишини олдини олиш мақсадида 900 метр узунликдаги ва 30 метр чуқурликдаги девор қурилган. Шунингдек, зарарли радиоактив моддаларни ушлаб туриш учун станция атрофидаги ер ҳам музлатилиши керак.
TEPCO бир кунда станциядан келадиган 2300 куб метр сувни қайта ишлаб, радиоактив моддаларни ажратиш имкониятига эга. Бундан кўзланган асосий мақсад: сувнинг ҳар қандай сизиб чиқишини тўхтатиш ва резервуарларга фақат қайта ишланган сувни жўнатиш. Мақсад амалга ошгач резервуарлардаги барча тозаланган сув денгизга қўйиб юборилиши мумкин бўлади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)